பாஜகவிலிருந்து விலகி புதிய அமைப்பு-அண்ணாமலை

பாஜகவின் முன்னாள் தலைவரான கே.அண்ணாமலை, அக்கட்சியில் இருந்து விலகி புதிய அமைப்பு தொடங்குவதாக அறிவித்துள்ளார். இந்த அறிவிப்பு அரசியல் வட்டாரத்தில் பெரும் பரபரப்பை ஏற்படுத்தியுள்ள நிலையில், அவரது ஆதரவாளர்கள் மத்தியில் பெரும் வரவேற்பைப் பெற்றுள்ளது.

இதனைத் தொடர்ந்து, ஈரோடு பன்னீர்செல்வம் பூங்காவில் அண்ணாமலையின் ஆதரவாளர்கள் நூற்றுக்கும் மேற்பட்டோர் ஒன்று திரண்டனர். அவர்கள் பொதுமக்களுக்கும், அந்த வழியாக பேருந்துகளில் பயணித்த பயணிகளுக்கும் இனிப்புகளை வழங்கி தங்களது உற்சாக கொண்டாட்டத்தில் ஈடுபட்டனர். மேலும், சுற்றுச்சூழல் விழிப்புணர்வை ஏற்படுத்தும் வகையில் பொது மக்களுக்கு இலவசமாக மரக்கன்றுகளையும் விநியோகித்தனர்.

அண்ணாமலை பாஜகவிலிருந்து விலகியதைத் தொடர்ந்து, ஏற்கனவே அக்கட்சியில் தீவிரமாகப் பணியாற்றி வந்த அவரது ஆதரவாளர்கள் மற்றும் நிர்வாகிகள் பலரும் தங்களது பொறுப்புகளைத் துறந்து, இந்த புதிய அமைப்பில் தங்களை இணைத்துக் கொண்டுள்ளதாகத் தெரிவித்துள்ளனர்.

இந்த கொண்டாட்டத்தின் போது அண்ணாமலையின் புதிய அமைப்பில் இணைந்துள்ள நிர்வாகி அக்னி ராஜேஷ் செய்தியாளர்களிடம் பேசினார். அப்போது, அண்ணாமலை தொடங்கியுள்ள இந்த புதிய அமைப்பு முழுக்க முழுக்க தமிழர்களின் நலனுக்காகவும், தமிழ்நாட்டின் உரிமை மற்றும் மேம்பாட்டிற்காகவும் மட்டுமே தொடர்ந்து முன்னின்று போராடும் என்று அவர் உறுதியுடன் கூறினார். அண்ணாமலையின் இந்த புதிய அரசியல் நகர்வு ஈரோடு மாவட்ட ஆதரவாளர்களிடையே பெரும் எழுச்சியை ஏற்படுத்தியுள்ளது.