CBSE12ஆம் வகுப்பில் வெற்றி பெற்ற மாணவர்களுக்கு வாழ்த்து

CBSE 12ஆம் வகுப்பு தேர்வில் வெற்றி பெற்ற மாணவர்களுக்கு டாக்டர் ஆ.ஹென்றி வாழ்த்து — தோல்வி கண்ட மாணவர்கள் துவண்டு போக வேண்டாம் என உணர்வுபூர்வ அறிவுரை

 

CBSE 12ஆம் வகுப்பு பொதுத்தேர்வில் வெற்றி பெற்ற அனைத்து மாணவ, மாணவியர்களுக்கும் அகில இந்திய ஜனநாயக மக்கள் நலப் பேரவையின் நிறுவனர் மற்றும் தேசிய தலைவர் டாக்டர் ஹென்றி மனமார்ந்த பாராட்டுகளையும் இனிய வாழ்த்துகளையும் தெரிவித்துள்ளார்.

இதுகுறித்து அவர் வெளியிட்டுள்ள அறிக்கையில் கூறியதாவது:

இன்று வெளியான CBSE 12ஆம் வகுப்பு தேர்வு முடிவில் வெற்றி பெற்றுள்ள மாணவச் செல்வங்கள் அனைவரும் தங்களது உழைப்பு, அர்ப்பணிப்பு மற்றும் விடாமுயற்சியின் மூலம் இந்த வெற்றியை பெற்றுள்ளனர். இந்த வெற்றி உங்கள் வாழ்க்கையின் அடுத்த கட்ட வளர்ச்சிக்கான முதல் படியாக அமைய வேண்டும். உங்கள் கனவுகளை உயரமாக வைத்துக் கொண்டு, ஒழுக்கத்துடனும் தன்னம்பிக்கையுடனும் தொடர்ந்து பயணிக்க வேண்டும்.

அதே நேரத்தில், எதிர்பார்த்த மதிப்பெண்களை பெறாத மாணவர்கள் அல்லது இந்த முறை வெற்றி வாய்ப்பை தவறவிட்ட மாணவச் செல்வங்கள் எந்தவிதமான சோர்வும், விரக்தியும், மனஅழுத்தமும் அடைய வேண்டாம்.

ஒரு தேர்வின் முடிவு வாழ்க்கையின் இறுதியல்ல. இது உங்கள் எதிர்காலத்தை முடிவு செய்யும் கடைசி வாய்ப்பும் அல்ல. வாழ்க்கை என்பது மிகப் பெரிய பயணம். அந்த பயணத்தில் சில தடைகள் வரலாம்; சில நேரங்களில் தோல்விகளும் வரலாம். ஆனால், தோல்வி என்பது முடிவு அல்ல — அது இன்னொரு வெற்றிக்கான தயாரிப்பே.

“விடியும் என்ற நம்பிக்கையில் உறங்கச் செல்லும் மாணவச் செல்வங்களே… உங்களால் முடியும் என்ற தன்னம்பிக்கையோடு மீண்டும் எழுங்கள். அடுத்து வரக்கூடிய தேர்வுகளையும், வாழ்க்கை வாய்ப்புகளையும் தைரியமாக எதிர்கொள்ளுங்கள். நிச்சயம் வெற்றி உங்கள் வசமாகும்.”

எனவே, எந்த மாணவரும் மனமுடைந்து தவறான முடிவுகளை எடுக்கக் கூடாது. பெற்றோர்களும் தங்களது பிள்ளைகளை திட்டாமல், ஒப்பீடு செய்யாமல், அவர்களுக்கு தைரியம் அளித்து பக்கபலமாக இருக்க வேண்டும். “அடுத்து என்ன செய்யலாம்?” என்ற பாதையை காட்ட வேண்டும் தவிர, “ஏன் இப்படியாகிவிட்டது?” என்ற கேள்வியால் அவர்களை மேலும் காயப்படுத்தக் கூடாது.

மேலும், வெற்றி பெற்ற மாணவர்களும் தங்களது நண்பர்களில் வெற்றி வாய்ப்பை இழந்தவர்களை கிண்டல் செய்யாமல், அவர்களை அரவணைத்து தைரியம் சொல்ல வேண்டும். உண்மையான கல்வி என்பது மதிப்பெண்களில் மட்டுமல்ல; மனிதநேயத்திலும், நண்பர்களுக்கு துணையாக நிற்பதிலும் உள்ளது.

மாணவச் செல்வங்கள் அனைவரும் வாழ்க்கையில் உயர்ந்து சாதிக்க வேண்டும் என்பதே சமுதாயத்தின் எதிர்பார்ப்பாகும். நம்பிக்கை, முயற்சி, விடாமுயற்சி ஆகியவை இருந்தால் எந்த தோல்வியையும் வெற்றியாக மாற்ற முடியும்.

அனைத்து மாணவ, மாணவியர்களுக்கும் மீண்டும் மனமார்ந்த வாழ்த்துக்களையும், எதிர்கால வாழ்க்கையில் மிகப்பெரிய வெற்றிகளை பெற வாழ்த்துகளையும் தெரிவித்துக் கொள்கிறேன் என அகில இந்திய ஜனநாயக மக்கள் நலப் பேரவையின் நிறுவனர் மற்றும் தேசிய தலைவர் டாக்டர் ஆ.ஹென்றி தெரிவித்துள்ளார்.