சூர்யகுமார் யாதவ் மட்டுமல்ல.. ஒவ்வொரு வீரருக்கும் திட்டங்கள் வைத்துள்ளோம்: பாக். கேப்டன் பாபர் அசாம்

மெல்போர்ன்,

டி20 உலகக்கோப்பையில் இந்திய அணி நாளை பாகிஸ்தானை எதிர்கொள்கிறது. ரசிகர்களிடையே மிகுந்த எதிர்பார்ப்பு நிலவிவரும் இந்த போட்டிக்கு முன்பாக பாகிஸ்தான் கேப்டன் செய்தியாளர்களை சந்தித்தார். அப்போது அவர் கூறுகையில்:- நாளை நடைபெறும் போட்டியின்போது மழை குறுக்கிட வாய்ப்புள்ளதாக தெரியவந்துள்ளது. போட்டி முழுமையாக நடைபெற இருந்தால், நன்றாக இருக்கும்.

ஆனால் மழையின் காரணமக குறுகிய வடிவிலான போட்டியாக இருந்தாலும், அதனை எதிர்கொள்ள நாங்கள் தயாராக உள்ளோம். இந்திய அணியை பொறுத்தவரை டி20 போட்டிகளில் சூர்யகுமார் யாதவ் பந்துகளை நாலாபுறமும் சிதறடித்து பந்துவீச்சாளர்களை மிரட்டுகிறார். எங்களிடம் சூர்யகுமார் யாதவ் மட்டுமல்ல, ஒவ்வொரு வீரருக்கும் திட்டங்கள் உள்ளன. அவற்றை நாங்கள் சரியாகச் செயல்படுத்த முடியும் என்று நம்புகிறேன் ஆசிய கோப்பை சர்ச்சையால் பிசிசிஐ மற்றும் பிசிபி இடையே நிறைய பதற்றம் இருக்கலாம்.

ஆனால் இரு தரப்பு வீரர்களும் ஒருவருக்கொருவர் நல்ல உறவைக் கொண்டுள்ளனர். நாங்கள் இந்திய வீரர்களுடன் ஒரு நல்ல பிணைப்பைப் பகிர்ந்து கொண்டுள்ளோம். அதைத்தான் தொழில்முறை விளையாட்டு வீரர்கள் செய்கிறார்கள். நாங்கள் அனைவரும் எங்கள் அணிகளுக்கு 100 சதவீத பங்களிப்பை கொடுப்பது களத்திலும் எங்களுக்கிடையே நல்ல உறவுக்கு உதவுகிறது. இவ்வாறு அவர் தெரிவித்தார்.