அண்ணாமலையின் பிறந்தநாளை முன்னிட்டு ரத்ததானம்

பாஜக முன்னாள் மாநில தலைவர் கே.அண்ணாமலையின் பிறந்தநாளை முன்னிட்டு, ஈரோடு மாவட்ட ஆதரவாளர்கள் மற்றும் கட்சி நிர்வாகிகள் ஆடம்பரக் கொண்டாட்டங்களைத் தவிர்த்து, மக்களுக்குப் பயன் தரும் வகையில் மனிதாபிமான நற்பணிகளில் ஈடுபட முடிவு செய்தனர்.

அதன்படி, ஈரோடு அரசு தலைமை மருத்துவமனையின் ரத்த வங்கியின் இருப்பை அதிகரிக்கும் நோக்கிலும், அவசர கால மருத்துவ தேவைகளுக்காக ஏழை, எளிய மக்களுக்கு உதவும் வகையிலும் சிறப்பு ரத்ததான முகாம் ஏற்பாடு செய்யப்பட்டது. இந்த முகாமில் அண்ணாமலையின் ஆதரவாளர்கள், இளைஞர்கள் மற்றும் கட்சி நிர்வாகிகள் என ஏராளமானோர் தாமாக முன்வந்து தங்களது ரத்தத்தைக் கொடையாக அளித்தனர்.

மருத்துவமனைக்கு சிகிச்சைக்காக வரும் நோயாளிகளின் உயிர் காக்கும் நோக்கில் திரளானோர் ரத்தம் கொடுத்த இந்தச் செயல் மருத்துவமனை ஊழியர்களிடையேயும், பொதுமக்களிடையேயும் பெரும் நெகிழ்ச்சியை ஏற்படுத்தியது.

ரத்ததான முகாமோடு மட்டுமின்றி, மருத்துவமனைக்கு சிகிச்சைக்காக வந்துள்ள வெளிநோயாளிப் பிரிவினர், உள்நோயாளிகளாக இருக்கும் ஏழை எளிய மக்கள் மற்றும் அவர்களுடன் தங்கியிருக்கும் உதவியாளர்கள் எனப் பலருக்கும் ஆதரவாளர்கள் சார்பில் அறுசுவை அன்னதானம் வழங்கப்பட்டது.

இதனைத் தொடர்ந்து, கே.அண்ணாமலை தீவிர ஆதரவாளர் அக்னி ராஜேஷ் தலைமையில் ஈரோடு அரசு மருத்துவமனை ரவுண்டானா பகுதியில் பெரிய அளவிலான கேக் வெட்டப்பட்டது. அண்ணாமலையைப் புகழ்ந்து முழக்கங்களை எழுப்பியவாறு, அங்கு திரண்டிருந்த பொதுமக்களுக்கும், வழிப்போக்கர்களுக்கும், தொண்டர்களுக்கும் லட்டுகள் மற்றும் இனிப்புகள் வழங்கி தங்களது மகிழ்ச்சியைப் பகிர்ந்து கொண்டனர்.

ஆடம்பர பேனர்கள் வைப்பதையோ, பட்டாசுகள் வெடிப்பதையோ முற்றிலுமாகத் தவிர்த்து, ஏழை எளிய மக்களுக்கு உதவும் வகையிலான இந்த அன்னதானம் மற்றும் ஏராளமானோர் பங்கேற்ற ரத்தக்கொடை போன்ற நற்பணிகள் ஈரோடு பகுதி மக்களிடையே பெரும் பாராட்டுகளையும் நெகிழ்ச்சியையும் பெற்றுள்ளன.இந்நிகழ்ச்சியை ரவீந்திரன், ரமேஷ், அண்ணாதுரை மற்றும் கௌதம் ஆகியோர் ஒருங்கிணைத்தனர்.