சென்னையில் புதிய விற்பனையகம்

உலகப் புகழ்பெற்ற சொகுசு கார் தயாரிப்பு நிறுவனமான ரோல்ஸ்-ராய்ஸ் மோட்டார் கார்ஸ், சென்னையில் தனது புதிய விற்பனையகத்தைத் திறந்துள்ளது. நிறுவனத்தின் உலகளாவிய வடிவமைப்பு அடையாளத்தைப் பிரதிபலிக்கும் வகையில் மறுவடிவமைக்கப்பட்டுள்ள இந்த விற்பனையகம், சென்னை மற்றும் தென்னிந்தியா முழுவதும் உள்ள வாடிக்கையாளர்களுக்கு தனிப்பட்ட விருப்பங்களுக்கேற்ப கார்களை வடிவமைக்கும் பிரத்தியேக அனுபவத்தை வழங்குகிறது.

2013-ஆம் ஆண்டு முதல் இப்பகுதியில் வாடிக்கையாளர்களுக்குச் சேவை வழங்கி வரும் ரோல்ஸ்-ராய்ஸ் மோட்டார் கார்ஸ் சென்னை, இந்தப் புதிய விற்பனையகத்தின் மூலம் தனது இருப்பை மேலும் வலுப்படுத்தியுள்ளது. இதன் திறப்பு விழாவில், நிறுவனத்தின் விற்பனை மற்றும் பிராண்ட் இயக்குநர் ஜூலியன் ஜென்கின்ஸ் கலந்துகொண்டார்.

புதிய விற்பனையகம் படைப்பாற்றல், கைவினைத்திறன் மற்றும் தனித்துவமான வடிவமைப்பை மையமாகக் கொண்டு உருவாக்கப்பட்டுள்ளது. ரோல்ஸ்-ராய்ஸின் புகழ்பெற்ற பாந்தியன் கிரில்லின் வடிவமைப்பை நினைவூட்டும் நுழைவாயில், வாடிக்கையாளர்களுக்கு தனித்துவமான அனுபவத்தை வழங்குகிறது. மேலும், அவர்களின் கற்பனை மற்றும் விருப்பங்களுக்கேற்ப கார்களை வடிவமைப்பதற்கான பிரத்யேக வடிவமைப்புப் பகுதியும், இந்தியக் கலை மற்றும் வடிவமைப்பைப் போற்றும் காட்சியகமும் இங்கு இடம்பெற்றுள்ளன.

இதுகுறித்து ரோல்ஸ்-ராய்ஸ் மோட்டார் கார்ஸ் நிறுவனத்தின் விற்பனை மற்றும் பிராண்ட் இயக்குநர் ஜூலியன் ஜென்கின்ஸ் கூறுகையில், “ரோல்ஸ்-ராய்ஸ் நிறுவனத்தின் வரலாற்றில் இந்தியா தனித்துவமான இடத்தைப் பெற்றுள்ளது. ஒரு நூற்றாண்டுக்கும் மேலாக இந்திய வாடிக்கையாளர்கள் தங்களின் தனிப்பட்ட ரசனை மற்றும் விருப்பங்களைப் பிரதிபலிக்கும் வகையில் கார்களை வடிவமைத்து வருகின்றனர். இந்தப் புதிய விற்பனையகம் எங்கள் நிறுவனத்திற்கும் வாடிக்கையாளர்களுக்கும் முக்கியமான மைல்கல்லாக அமைவதுடன், இந்தியச் சந்தையின் மீதான எங்களது நீண்டகால அர்ப்பணிப்பையும் வெளிப்படுத்துகிறது,” என்றார்.

ரோல்ஸ்-ராய்ஸ் மோட்டார் கார்ஸ் சென்னை நிறுவனத்தின் முதன்மை டீலரான குன் எக்ஸ்குளூசிவ் நிறுவனத்தின் வசந்தி பூபதி கூறுகையில், “ரோல்ஸ்-ராய்ஸ் மோட்டார் கார்ஸ் நிறுவனத்துடனான எங்கள் உறவு, நம்பிக்கை மற்றும் சிறப்பான சேவையை அடிப்படையாகக் கொண்டது. புதிதாக மறுவடிவமைக்கப்பட்டுள்ள இந்த விற்பனையகம், சென்னை மற்றும் தென்னிந்திய வாடிக்கையாளர்களின் விருப்பங்கள் மற்றும் எதிர்பார்ப்புகளுக்கு ஏற்ப உருவாக்கப்பட்டுள்ளது. அவர்களுக்கு தனித்துவமான அனுபவத்தை வழங்கும் இந்தச் சூழலுக்கு வாடிக்கையாளர்களை வரவேற்பதில் பெருமகிழ்ச்சி அடைகிறோம்,” என்றார்.

2025-ஆம் ஆண்டில் ஆசிய-பசிபிக் பிராந்தியத்தில் ரோல்ஸ்-ராய்ஸ் மோட்டார் கார்ஸ் நிறுவனத்தின் அதிக வளர்ச்சி கண்ட சந்தையாக இந்தியா திகழ்ந்தது. தனிப்பயனாக்கப்பட்ட சொகுசு கார்களுக்கான வாடிக்கையாளர் ஆர்வம் அதிகரித்து வரும் நிலையில், சென்னையில் புதிய விற்பனையகம் திறக்கப்பட்டிருப்பது இந்தியச் சந்தையில் நிறுவனத்தின் வளர்ச்சிக்கும் தென்னிந்திய வாடிக்கையாளர்களுடனான உறவை வலுப்படுத்துவதற்கும் முக்கியப் பங்களிக்கும் என எதிர்பார்க்கப்படுகிறது.