தமிழ்நாடு முதலமைச்சர் மு.க.ஸ்டாலின் தலைமையில் அமைச்சரவை கூட்டம்
தமிழ்நாடு முதலமைச்சர் மு.க.ஸ்டாலின் தலைமையில் அமைச்சரவை கூட்டம் இன்று நடைபெற உள்ளது.
தமிழக அரசின் 2022-23 நிதியாண்டுக்கான பட்ஜெட், இம்மாதம் தாக்கல் செய்யப்பட உள்ளதாக தகவல் வெளியாகியுள்ளது.
மறுநாள் வேளாண் துறைக்கான தனி பட்ஜெட்டும் தாக்கல் செய்யப்பட உள்ளது.
முன்னதாக பட்ஜெட்டில் இடம் பெற வேண்டிய முக்கிய அம்சங்கள் குறித்து விவசாயிகள், வணிகர் சங்கங்கள், தொழில் பிரிவினர் உள்ளிட்ட பல்வேறு தரப்பினர்களுடன் துறை வாரியாக அமைச்சர்கள் கருத்துக்கேட்பு கூட்டங்களை நடத்தினர்.இதைத் தொடர்ந்து, பட்ஜெட் தயாரிப்புக்கான பணிகள் வேகமாக நடந்து வருகின்றன.
இந்நிலையில், பட்ஜெட்டில் அறிவிக்கப்பட உள்ள திட்டங்களுக்கு ஒப்புதல் அளிப்பதற்கான அமைச்சரவைக் கூட்டம், சென்னை தலைமைச் செயலகத்தில் உள்ள நாமக்கல் கவிஞர் மாளிகையில் இன்று மாலை 5 மணிக்கு முதலமைச்சர் ஸ்டாலின் தலைமையில் நடைபெறவுள்ளது.
இக்கூட்டத்தில அனைத்து அமைச்சர்கள், தலைமைச் செயலர் உள்ளிட்ட பல்வேறு துறைகளின் செயலர்கள் பங்கேற்க உள்ளனர்.குடும்பத் தலைவிகளுக்கு மாதம் ஆயிரம் ரூபாய் வழங்கும் திட்டம் மற்றும் பட்ஜெட்டில் இடம் பெற வேண்டிய முக்கிய அம்சங்கள் குறித்து இக்கூட்டத்தில் ஆலோசனை மேற்கொள்ளப்படும் என தகவல் வெளியாகியுள்ளது.
