ஈரோடு கிழக்கு ப.க.பழனிச்சாமியின் நூதன பிரச்சாரம்

ஈரோடு கிழக்கு: “அக்கவுண்டில் ரூ.2000 வந்து விழும்” – மண்டல தலைவர் ப.க.பழனிச்சாமியின் நூதன பிரச்சாரத்தால் பொதுமக்கள் உற்சாகம்**

ஈரோடு கிழக்கு தொகுதி இடைத்தேர்தலில் மதச்சார்பற்ற முற்போக்கு கூட்டணியின் காங்கிரஸ் வேட்பாளராகப் போட்டியிடும் கோபிநாத் பழனியப்பனை ஆதரித்து, ஈரோடு மாநகராட்சி 27 மற்றும் 37-வது வார்டுகளில் தீவிர வாக்கு சேகரிப்பு நடைபெற்றது. இந்த பிரச்சாரத்தின் போது வேட்பாளர் கோபிநாத் பழனியப்பன் வீதி வீதியாகச் சென்று திமுக அரசின் சாதனைகளையும், தேர்தல் வாக்குறுதிகளையும் எடுத்துரைத்து பொதுமக்களிடம் ஆதரவு திரட்டினார். இவருக்கு ஆதரவாக வாக்கு சேகரிப்பில் ஈடுபட்ட திமுக பொருளாளரும், ஒன்றாம் மண்டல தலைவருமான ப.க.பழனிச்சாமி, பொதுமக்களைக் கவரும் வகையில் நூதன முறையில் பிரசாரம் செய்தார். அப்போது அவர் பேசுகையில், “நீங்கள் கை சின்னத்தில் வாக்களித்து கோபிநாத் பழனியப்பனை வெற்றி பெறச் செய்யுங்கள்; தமிழக முதல்வர் மு.க.ஸ்டாலின் அவர்கள் அறிவித்தபடி, உங்கள் வங்கி கணக்கில் ‘டொக்கு டொக்கு டொக்கு’ என்று 2000 ரூபாய் வந்து விழும்” என நகைச்சுவை ததும்பப் பேசியது அங்கிருந்த பொதுமக்களை வெகுவாகக் கவர்ந்ததுடன் பெரிய வரவேற்பையும் பெற்றது. இதனைத் தொடர்ந்து கோட்டை பகுதி செயலாளர் பொ.இராமச்சந்திரன் மற்றும் அவரது மனைவியும் மாமன்ற உறுப்பினருமான ஜெயந்தி இராமச்சந்திரன் ஆகியோர் வீடு வீடாகச் சென்று துண்டுப் பிரசுரங்களை வழங்கி தீவிரமாக வாக்கு சேகரித்தனர். இந்த எழுச்சிமிகு பிரச்சாரத்தில் மதச்சார்பற்ற முற்போக்கு கூட்டணியில் இடம்பெற்றுள்ள திமுக, காங்கிரஸ் உள்ளிட்ட அனைத்து கூட்டணிக் கட்சிகளின் நிர்வாகிகள் மற்றும் தொண்டர்கள் திரளாகக் கலந்து கொண்டு வேட்பாளருக்கு ஆதரவாகச் செயல்பட்டனர். வார்டு பகுதிகளில் நடைபெற்ற இந்த விறுவிறுப்பான வாக்கு சேகரிப்பு தேர்தல் களத்தில் பெரும் கவனத்தை ஈர்த்துள்ளது.