Today’s Rasi Palan : இன்றைய ராசி பலன் சனிக்கிழமை ஜனவரி 01, 2022

Today’s Rasi Palan : இன்றைய ராசி பலன் சனிக்கிழமை ஜனவரி 01, 2022

சென்னை: பிலவ வருடம் மார்கழி 17 ஆம் தேதி ஜனவரி 01, 2022 சனிக்கிழமை. திரயோதசி இரவு 07.17 மணிவரை அதன் பின் சதுர்த்தசி. கேட்டை இரவு 07.17 மணி வரை அதன் பின் மூலம். புத்தாண்டின் முதல் நாள் சந்திரன் இன்றைய தினம் விருச்சிக ராசியில் பயணம் செய்கிறார். மேஷ ராசிக்காரர்களுக்கு இரவு வரை சந்திராஷ்டமம் உள்ளதால் கவனமும் நிதானமும் தேவை. இரவுக்கு மேல் ரிஷப ராசிக்காரர்களுக்கு சந்திராஷ்டமம் தொடங்குகிறது. மேஷம் முதல் மீனம் வரை 12 ராசிக்காரர்களுக்கும் பலன்கள் பரிகாரங்களைப் பார்க்கலாம்.

மேஷம்
உங்கள் ராசிக்கு எட்டாவது வீட்டில் ராசி நாதன் செவ்வாய் உடன் கேது, சந்திரன் இணைந்திருக்கின்றனர். வாகன பயணங்களில் நிதானம் தேவை. பேச்சில் கவனம் அவசியம். அவசரப்பட்டு பேசி விட்டு சிக்கலில் மாட்டிக்கொள்ள வேண்டாம். உங்கள் ராசிக்கு இரவு 07 மணி வரை சந்திராஷ்டமம் இருப்பதால் எதிலும் சற்று நிதானமாக செயல்படுவது நல்லது. தொழில் வியாபார ரீதியாக இருக்கும் பிரச்சினைகள் ஓரளவு குறையும். இன்று நீங்கள் உடல் ரீதியாக பலவீனமாக காணப்படுவீர்கள். இரவு 7 மணிக்கு மேல் உடல் ஆரோக்கியம் நன்றாக இருக்கும்.

ரிஷபம்
சந்திரன் பார்வை உங்கள் ராசிக்கு கிடைக்கிறது. திருமண சுப காரியம் பற்றி பேசலாம். இன்று உங்களுக்கு எதிர்பாராத செலவுகள் வரும். வியாபாரத்தில் ஏற்பட்ட நெருக்கடிகள் நீக்கும். உங்கள் ராசிக்கு இரவு 7 மணி முதல் சந்திராஷ்டமம் தொடங்குவதால் பணம் கொடுக்கல் வாங்கலில் கவனம் தேவை. வீண் வாக்குவாதங்களை தவிர்க்கவும். இரவு நேர பயணங்களைத் தவிர்த்து விடவும்.

மிதுனம்
சந்திரன் பயணம் ஆறாம் வீட்டில் உள்ளது. கணவன் மனைவியிடையே இருந்த மனஸ்தாபங்கள் நீங்கும். குடும்பத்தில் ஒற்றுமையும் மகிழ்ச்சியும் கூடும். இன்று நீங்கள் தொட்ட காரியம் அனைத்தும் வெற்றி அடையும். அரசு வழியில் எதிர்பார்த்த உதவிகள் கிடைக்கும். தொழில் சம்பந்தமான புதிய ஒப்பந்தங்கள் கைகூடும். வீட்டிற்குத் தேவையான புதிய பொருட்கள் வாங்குவீர்கள். திடீர் பண வரவினால் மன மகிழ்ச்சி அதிகரிக்கும்.

கடகம்
சந்திரன் உங்கள் ராசிக்கு ஐந்தாம் வீட்டில் பயணம் செய்கிறார். இன்று நீங்கள் எடுத்த காரியத்தை வெற்றியுடன் செய்து முடிப்பீர்கள். நண்பர்களின் உதவியால் பண பிரச்சினைகள் ஓரளவு குறையும். கூட்டாளிகளின் ஆலோசனைகளும் ஒத்துழைப்பும் வியாபாரத்தில் நல்ல முன்னேற்றத்தை ஏற்படுத்தும். கூட்டாளிகளின் உதவியால் லாபம் அதிகரிக்கும். குடும்பத்தில் பெரியவர்களின் அன்பும் ஆதரவும் கிடைக்கும்.

சிம்மம்
சந்திரன் உங்கள் ராசிக்கு நான்காம் வீட்டில் பயணம் செய்கிறார். இன்று குடும்பத்தில் உறவினர்களால் மனமகிழ்ச்சி அதிகரிக்கும். உத்தியோகத்தில் சிலருக்கு எதிர்பார்த்த இடமாற்றம் உண்டாகும். நண்பர்கள் மூலம் உதவிகள் எளிதில் கிடைக்கும். வியாபாரம் சிறப்பாக நடைபெறும். சொத்துக்கள் வாங்கும் முயற்சியில் நல்ல முன்னேற்றம் ஏற்படும். உடல் ஆரோக்கியம் அதிகரிக்கும். நீண்ட நாட்களாக வாங்க வேண்டும் என்று நினைத்த பொருட்களை வாங்குவீர்கள். பிள்ளைகள் மூலம் நல்ல செய்தி தேடி வரும்.

கன்னி
சந்திரன் உங்கள் ராசிக்கு மூன்றாவது வீட்டில் பயணம் செய்கிறார். புதிய முயற்சிகளுக்கு வெற்றி கிடைக்கும். இன்று உங்களுக்கு பணவரவு நன்றாக இருக்கும். உறவினர்களின் உதவி கிடைக்கும். உடல் ஆரோக்கியத்தில் இருந்த பிரச்சினை நீங்கும். வியாபார வளர்ச்சிக்கான முயற்சிகளில் குடும்பத்தினரின் ஆதரவும் ஒத்துழைப்பும் கிடைக்கும். உறவினர்களின் உதவியால் பணப் பிரச்சினைகள் குறையும். வருமானம் பெருகும். லாபம் அதிகரிக்கும்.

துலாம்
சந்திரன் உங்கள் ராசிக்கு இரண்டாவது வீட்டில் பயணம் செய்கிறார். இன்று நண்பர்கள் மூலம் சுப செய்திகள் வந்து சேரும். பெண்களுக்கு மன மகிழ்ச்சி தரும் சம்பவங்கள் நடைபெறும். பொன் நகை சேர்க்கை மகிழ்ச்சியினை தரும். பிள்ளைகளால் அனுகூலம் உண்டாகும். குடும்பத்தினரின் அன்பையும், ஆதரவையும் பெறுவீர்கள். தொழில் ரீதியாக மேற்கொள்ளும் பயணங்களில் வெற்றி கிடைக்கும்.

விருச்சிகம்
சந்திரன் உங்கள் ராசிக்குள் பயணம் செய்கிறார். கேது செவ்வாய் உடன் சந்திரன் இணைந்துள்ளார். இன்று நீங்கள் மனஉறுதியோடு பிரச்சினைகளை எதிர்கொள்ள வேண்டி வரும். குடும்பத்தினருடன் தேவையற்ற கருத்து வேறுபாடுகள் தோன்றும். வாகனங்களால் வீண் செலவுகள் ஏற்படலாம். எதிலும் கவனம் தேவை. உறவினர்கள் பக்கபலமாக இருப்பார்கள். ஆலய வழிபாடு மன அமைதியைத் தரும்.

தனுசு
சந்திரன் இன்று உங்கள் ராசிக்கு விரைய ஸ்தானத்தில் பயணம் செய்கிறார். குடும்பத்தில் இருந்த பிரச்சினைகள் நீங்கும். பணம் கொடுக்கல் வாங்கல் லாபகரமாக இருக்கும். சுபகாரியங்கள் கைகூடும். கொடுத்த கடன்கள் கைக்கு வந்து சேரும்.இன்று குடும்பத்தில் பொருளாதாரம் மிகச் சிறப்பாக இருக்கும். சுப விரைய செலவுகள் அதிகரிக்கும். உறவினர்கள் மூலம் உங்கள் பிரச்சினைகளுக்கு தீர்வு கிடைக்கும். புதிய தொழில் தொடங்கும் எண்ணம் நிறைவேறும்.

மகரம்
சந்திரன் உங்கள் ராசிக்கு லாப ஸ்தானத்தில் பயணம் செய்கிறார். மூத்த சகோதரர் வழியில் உதவி கிடைக்கும். இன்று உங்களுக்கு உறவினர்கள் வருகையால் நன்மை ஏற்படும். சுப விரைய செலவுகள் ஏற்படலாம். உடல் ஆரோக்கியத்தில் அக்கறை காட்டவும். திடீர் இட மாற்றம் ஏற்படும். வெளியூர் பயணம் செய்வதற்கான வாய்ப்புகள் தேடி வரும். சுப காரியங்கள் கைகூடும். புத்தாண்டு நாளில் புது மலர்ச்சியோடு இருப்பீர்கள்.

கும்பம்
சந்திரன் உங்கள் ராசிக்கு பத்தாம் வீடான தொழில் ஸ்தானத்தில் பயணம் செய்கிறார். புதிய வேலைக்கு முயற்சி செய்வீர்கள். இன்று குடும்பத்தில் உறவினர்கள் வருகையால் மகிழ்ச்சி நிலவும். வியாபாரத்தில் புதிய கூட்டாளிகள் இணைவார்கள். சிலருக்கு புதிய வாகனம் வாங்கும் யோகம் உண்டு. எதிரிகளின் தொல்லைகள் நீங்கும். கடன் பிரச்சினை முடிவுக்கு வரும்.

மீனம்
சந்திரன் உங்கள் ராசிக்கு ஒன்பதாம் வீட்டில் பயணம் செய்கிறார். உற்சாகமான மனநிலையில் இருப்பீர்கள். இன்று உங்கள் மனதிற்கு புது தெம்பு கிடைக்கும். குடும்பத்தில் சுபிட்சமும் மகிழ்ச்சியும் நிறைந்திருக்கும். நண்பர்களின் உதவியால் வியாபாரத்தில் நல்ல முன்னேற்றமான நிலை ஏற்படும். வெளியூர் பயணங்களால் நன்மை உண்டாகும்.